സഭയുടെ അനുരഞ്ജന സ്വഭാവം: സുറിയാനി ഓർത്തഡോക്സ് വീക്ഷണം

ബർ യുഹാനോൻ റമ്പാൻ

സുറിയാനി ഓർത്തഡോക്സ് സഭ എപ്പോഴും അതിൻ്റെ സഭാശാസ്ത്രത്തിൽ അനുരഞ്ജനത്തിൻ്റെ പ്രാധാന്യം ഊന്നിപ്പറഞ്ഞിട്ടുണ്ട്. ഈ ആശയം സഭ— ക്രിസ്തുവിൻ്റെ ശരീരം എന്ന ബൈബിൾ സങ്കൽപ്പത്തിൽ വേരൂന്നിയതാണ്, അവിടെ ഓരോ അംഗവും പരസ്പരബന്ധിതവും പരസ്പരാശ്രിതവുമാണ്. സുറിയാനി ഓർത്തഡോക്സ് പാരമ്പര്യത്തിൽ, കൂട്ടായ തീരുമാനമെടുക്കലിൻ്റെയും ഭരണത്തിൻ്റെയും തത്വമായി അനുരഞ്ജനത്തെ മനസ്സിലാക്കുന്നു, അവിടെ മെത്രാൻമാരുടെയും വൈദികരുടെയും എല്ലാം കൂട്ടായ ജ്ഞാനവും വിവേചനാധികാരവുമാണ് സഭയെ നയിക്കുന്നത്.

 ആദിമ ക്രൈസ്തവ സമൂഹങ്ങളുടെ ബൈബിൾ വിവരണങ്ങളിൽ സഭയുടെ അനുരഞ്ജന സ്വഭാവം പ്രകടമാണ്. തർക്കങ്ങൾ പരിഹരിക്കുന്നതിനും സുപ്രധാന തീരുമാനങ്ങൾ എടുക്കുന്നതിനുമായി അപ്പോസ്തലന്മാരും മൂപ്പന്മാരും കൗൺസിലിൽ ഒത്തുകൂടുന്നതിനെയാണ് അപ്പോസ്തലന്മാരുടെ പ്രവൃത്തികൾ വിവരിക്കുന്നത് (പ്രവൃത്തികൾ 15:6-35). അതുപോലെ, വിശുദ്ധ പൗലോസിൻ്റെ ലേഖനങ്ങൾ സഭയിലെ അംഗങ്ങൾ തമ്മിലുള്ള ഐക്യത്തിൻ്റെയും യോജിപ്പിൻ്റെയും പ്രാധാന്യത്തെ ഊന്നിപ്പറയുന്നു (1 കോറി 1:10, എഫെ. 4:3-6). സഭയുടെ ജീവിതത്തിലും ഭരണത്തിലും അതിൻ്റെ തുടക്കം മുതൽ അനുരഞ്ജനം അനിവാര്യമായ ഒരു വശമായിരുന്നുവെന്ന് ഈ ബൈബിളിലെ മുൻകരുതലുകൾ തെളിയിക്കുന്നു.

 സുറിയാനി ഓർത്തഡോക്സ് പാരമ്പര്യത്തിൽ, തർക്കങ്ങൾ പരിഹരിക്കുന്നതിനും തീരുമാനങ്ങൾ എടുക്കുന്നതിനും സഭയെ നയിക്കുന്നതിനുമായി മെത്രാൻമാരുടെയും വൈദികരുടെയും എല്ലാം കൂടിച്ചേരലുകളുള്ള കൗൺസിലുകളുടെ (സിനഡ്) സ്ഥാപനത്തിലൂടെയാണ് അനുരഞ്ജനം പ്രകടിപ്പിക്കുന്നത്. സഭയുടെ ആദ്യ നൂറ്റാണ്ടുകളിൽ വിളിച്ചുകൂട്ടിയ എക്യുമെനിക്കൽ കൗൺസിലുകളുടെ പ്രവർത്തനത്തനങ്ങൾ അനുരഞ്ജനത്തിൻ്റെ മികച്ച ഉദാഹരണമാണ്. ക്രൈസ്തവലോകമെമ്പാടുമുള്ള ബിഷപ്പുമാർ ഉൾപ്പെട്ട ഈ കൗൺസിലുകൾ, സഭയുടെ സിദ്ധാന്തം, ആരാധനക്രമം, ഭരണം എന്നിവ രൂപപ്പെടുത്തുന്നതിൽ അന്ന് നിർണായക പങ്ക് വഹിച്ചു.

 സഭയുടെ അനുരഞ്ജന സ്വഭാവത്തിൽ മെത്രാൻ്റെ പങ്കിനെക്കുറിച്ചുള്ള സുറിയാനി ഓർത്തഡോക്സ് ധാരണയിലും മേല്പറഞ്ഞ കാര്യങ്ങൾ പ്രതിഫലിക്കുന്നു. സുറിയാനി സഭയിൽ, മെത്രാൻ ഒരു ഏകാകിയായ ഭരണാധികാരിയല്ല, മറിച്ച് വൈദികരുടെയും സാധാരണക്കാരുടെയും എല്ലാം ഒരു അനുരഞ്ജന സമ്മേളനത്തിൻ്റെ അദ്ധ്യക്ഷൻ കൂടി ആണ്. മെത്രാൻ്റെ അധികാരം വ്യക്തിപരമായ കരിസ്മാറ്റയിലോ അധികാരത്തിലോ അധിഷ്ഠിതമല്ല, മറിച്ച് സഭയുടെ സേവകൻ എന്ന നിലയിലും അതിൻ്റെ പാരമ്പര്യത്തിൻ്റെ സംരക്ഷകനെന്ന നിലയിലും അദ്ദേഹത്തിൻ്റെ പങ്കിനെ അടിസ്ഥാനമാക്കിയുള്ളതാണ്. എപ്പിസ്കോപ്പൽ അധികാരത്തെക്കുറിച്ചുള്ള ഈ ധാരണ സുറിയാനി സഭയുടെ ഭരണത്തിൽ അനുരഞ്ജനത്തിൻ്റെയും കൂട്ടായ തീരുമാനങ്ങളുടേയും പ്രാധാന്യം ഊന്നിപ്പറയുന്നു.

*അനുരഞ്ജന വേദശാസ്ത്രം*

ആദിമ സഭയിൽ നിലനിന്നിരുന്ന ഒരു വേദശാസ്ത്ര പാരമ്പര്യം ആണ് "അനുരഞ്ജന സ്വഭാവം" (Conciliaer Nature of Church).സഭാ ചരിത്രത്തിന്റെ ഏടുകളിൽ, മൂന്ന് പരിശുദ്ധ സാർവത്രിക സുന്നഹദോസ്സുകൾ അതിന്റെ മകുടോദാഹരണങ്ങൾ ആണ്. സമാധാനത്തിനുള്ള ചർച്ചയ്ക്കായി ഉള്ള ഇത്തരം കൂടിവരവുകൾ വന്ദ്യ Dr.കെ. കെ കോശിയച്ചന്റെ പറയുന്നത് പോലെ , " പരിശുദ്ധാത്മാവ് ഇപ്രകാരമുള്ള കൂടി വരവുകളെ അനുരഞ്ജനത്തിലേക്കും, പുതുക്കത്തിലേക്കും, നവീകരണത്തിലേക്കും പൂർണ്ണസത്യത്തിലേക്കും സ്നേഹത്തിലേക്കും വഴി നടത്തും എന്ന വിശ്വാസത്തിലാണ് നാം കൂടിവരുന്നത്. " അദ്ദേഹം 1978 ൽ ബാംഗ്ലൂരിൽ കൂടിയ Faith & Order കമ്മീഷന്റെ സമ്മേളനത്തിൽ ഉരുത്തിരിഞ്ഞ കൺസീലിയർ ഫെല്ലോഷിപ്പിന് അനുയോജ്യമായ മൂന്നു പ്രധാന അനുപേക്ഷണീയ കാര്യങ്ങൾ ചൂണ്ടി കാണിക്കുന്നുണ്ട്. ആയവ, ഒന്നാമത്, ശ്ലൈഹീക വിശ്വാസത്തിന്റെ പൊതുവായ അംഗീകരണം, രണ്ടാമത് വിശുദ്ധ മാമോദിസ, വിശുദ്ധ പട്ടത്വം, വിശുദ്ധ കുർബാന തുടങ്ങി മൂന്നു കൗദാശിക പ്രമാണങ്ങളിലുള്ള പരസ്പര അംഗീകരണം, മൂന്നാമത്, ഉപദേശത്തിനും തീരുമാനങ്ങളെടുക്കുന്നത്തിനുമുള്ള പൊതുവായ വഴികളെ കുറിച്ചുള്ള സമ്മതം എന്നിവയാണ്.

മേൽപ്പറഞ്ഞ കണ്ടെത്തലുകൾ എല്ലാം ക്രോഡീകരിച്ച് കൊണ്ടു ലിമയിൽ വച്ചു ഒരു ഡോക്യുമെന്റ് തയ്യാർ ആക്കുകയും ആയതിൽ സുറിയാനി ഓർത്തോഡോക്സ് സഭയെ പ്രതിനിധീകരിച്ച മെത്രാൻമാർ ഒപ്പ് വയ്ക്കുകയും ചെയ്തിട്ടുണ്ട്. മലങ്കര സഭയെ പ്രതിനിധീകരിച്ചു പാത്രിയാർക്കീസ് വിഭാഗത്തിൽ നിന്നും മെത്രാൻകക്ഷി വിഭാഗത്തിൽ നിന്നുമുള്ള മെത്രാൻമാർ ഇതിൽ ഒപ്പ് വച്ചിട്ടുണ്ട്. ആയതു കൊണ്ടു ഒരു "വ്യവസ്ഥാപിത സമാധാനം" പ്രഖ്യാപിച്ച് അനുരഞ്ജനമാകാം എന്നു ഇതിൽ പെട്ട ഒരു സഭാ വിഭാഗം തലവൻ പ്രഖ്യാപിക്കുമ്പോൾ, തീർച്ചയായും, അതിന്റെ മാനദണ്ഡം എന്നത് അവരവർ ആയിരിക്കുന്ന ആകമാന അഥവാ മാതൃസഭയുടെ വേദശാസ്ത്ര പാരമ്പര്യങ്ങളും, ഇടപെടലും, മാധ്യസ്ഥവും ഒപ്പം ആധുനിക ക്രൈസ്തവ ലോകത്തിനു അനുരൂപമായി ക്രോഡീകരിച്ച ലിമ ഡോക്യുമെന്റ് ന്റെ നിയന്ത്രണ തത്വങ്ങളും (regulative principles) ആയിരിക്കേണ്ടത് അനിവാര്യമാണ്.

മറ്റൊരു വിധത്തിൽ പറഞ്ഞാൽ "വ്യവസ്ഥാപിത സമാധാനം" ഏകപക്ഷീയമായ ഒരു conditional settlement അല്ല മറിച്ച് ഇരു വിഭാഗങ്ങളും unconditional ആയി ഒരുമിച്ച് അവരവരുടെ ഭരണഘടന വ്യക്തമാക്കുന്ന പ്രകാരമുള്ള മാതൃസഭയുടെ പരമാധ്യക്ഷന്റെ അദ്ധ്യക്ഷതയിൽ കൂടുന്ന ഒരു കൺസീലിയർ ഫെല്ലോഷിപ് ആയിരിക്കണം. ആയതിനു ഇരുവിഭാഗങ്ങളും തയ്യാർ ആകുമ്പോൾ മാത്രം ആണ് സഭയുടെ അനുരഞ്ജന വേദശാസ്ത്രത്തിന്റെ സ്വഭാവം ഉൾക്കൊള്ളുന്ന ഒരു യഥാർത്ഥ വ്യവസ്ഥാപിത സമാധാനം നിലവിൽ വരുകയുള്ളു.

*'വ്യവസ്ഥാപിത സമാധാനം' മലങ്കര സഭയിൽ*

ഓറിഎന്റൽ ഓർത്തോഡോക്സ് സഭാകുടുംബത്തിൽ പെട്ടവരാണ് മലങ്കര യാക്കോബായ സഭയും മലങ്കര ഓർത്തോഡോക്സ് സഭയും. ഇതിൽ തന്നെ പെട്ട മറ്റൊരു സഭയാണ് അർമീനിയന് ഓർത്തോഡോക്സ് സഭ. പ്രസ്തുത സഭയുടെ ആർച്ചു ബിഷപ്പ് ആയിരുന്ന മോർ അരാം കെഷിഷിയാൻ "കൺസീലിയർ ഫെല്ലോഷിപ്" ആണ് ഐക്യതയുടെ ഏറ്റവും വലിയ മാതൃക എന്നു അഭിപ്രായപെട്ടിട്ടുണ്ട്. ഇത്തരം കൌൺസിലുകൾ മുഖേന സഭയിൽ ഉളവായിട്ടുള്ള ഭിന്നതകളുടെ വേദനകൾ ശമിപ്പിക്കുന്നതിനും മുറിവുകൾ സൗഖ്യപ്പെടുത്തുന്നതിനും ഭിന്നതകൾ പരിഹരിക്കുന്നതിനും സാധ്യത വളരെ ഏറെയുണ്ട് എന്നത് ഒരു പ്രത്യാശ നൽകുന്ന സംഗതി ആകുന്നു.

മോർ ബസെലിയോസ്‌ മത്തായി മൂന്നാമൻ കാതൊലിക്കയുടെ "വ്യവസ്ഥാപിത സമാധാനം" ദശാബ്ദങ്ങൾക്ക് മുൻപ് പിറമാടം ദയറയിൽ നിന്നും ഉയർന്ന സമാധാന സന്ദേശത്തിനു അനുരൂപമാണ്. പൌരസ്ത്യ കാതോലിക്ക മോർ ബാസലിയസ് പൌലോസ് ദ്വിതീയൻ പ്രഖ്യാപിച്ച പ്രകാരം "രണ്ടു സഹോദരീ സഭകൾ ആയി നില നിന്നും കൊണ്ടു പരസ്പരസ്നേഹത്തിലും, സഹവർത്വിത്വത്തിലും കഴിയുമ്പോൾ ആണ് വ്യവസ്ഥാപിതമായ ഒരു സമാധാനം ഉളവാകുകയുള്ളു." 1934 ഭരണഘടന എന്നത് അല്ല സമാധാനത്തിന്റെ മാനദണ്ഡമാക്കേണ്ടത്. അപ്രകാരം, ഏകപക്ഷീയമായ ഒരു നിലപാട് എടുത്തത് മൂലം ഇരു വിഭാഗങ്ങളും ആത്മാവിൽ ക്ഷയിച്ച് പോവുക ആണ് ഉണ്ടായത്. മുൻപ് സൂചിപിച്ചത് പോലെ കൺസീലിയർ സ്വഭാവം ഉളവാക്കുന്ന മനോഭാവം മുഖേന ഒരു മേശയ്ക്ക് ചുറ്റും Unconditional ആയിട്ട് ഇരിക്കുകയാണ് ആദ്യ ചുവട് വയ്പ്പ്. സമാധാനം പ്രഖ്യാപിച്ച അഭിവന്ദ്യ കാതോലിക്ക ബാവ തിരുമേനി ആയതിനു കൂടി മുൻകൈ എടുക്കുമെന്നു ഞാൻ ക്രിസ്തു യേശുവിൽ പ്രത്യാശിക്കുന്നു. പരിശുദ്ധ മോർ ഈഗ്നത്തിയോസ് അപ്രേം രണ്ടാമൻ ബാവ തിരുമേനി ഈ ലേഖനം എഴുതുമ്പോൾ മലങ്കരയിൽ എത്തിയിട്ടുണ്ട്. മലങ്കര ഓർത്തോഡോക്സ് സഭയുടെ കാതോലിക്ക ബാവ മുൻകൈ എടുത്താൽ പരിശുദ്ധ പാത്രിയാർക്കീസ് ബാവയുട അദ്ധ്യക്ഷതയിൽ ഇരുവിഭാഗം മെത്രാൻമാരുടെ സംഘവും കൂടി ചേർന്നു ഒരു "കൺസീലിയർ ഫെല്ലോഷിപ്പ്" സാധ്യമാകും. മറ്റൊന്നും വേണ്ട, ഒരു മണിക്കൂർ ഒരുമിച്ച് ഇരുന്നു പ്രാർത്ഥന നടത്തി ഒരു ആരംഭം കുറിക്കുവാൻ ഉള്ള ഒരു മനസ് മതിയാകും എല്ലാം ശുഭമാകുവാൻ.

ഏതായാലും, മോർ മത്തായി മൂന്നാമൻ ബാവ പ്രഖ്യാപിച്ച "വ്യവസ്ഥാപിത സമാധാനം" പ്രായോഗികമാക്കുവാൻ യാക്കോബായ വിഭാഗത്തിനു 'ശ്രേഷ്ഠ തോമസ് പ്രഥമൻ ബാവയുടെ' അഭാവം പരിഹരിക്കേണ്ടത് ഉണ്ട്. യാക്കോബായ സഭ അത് ഉടനെ നിർവഹിച്ചു കൊണ്ടു സമാധാന മുന്നേറ്റത്തോട് സഹകരിക്കും എന്നു തന്നെയാണ് എന്റെ ഉറച്ച വിശ്വാസം.

*ഉപസംഹാരം*

ചുരുക്കത്തിൽ സുറിയാനി സഭയുടെ അനുരഞ്ജന സ്വഭാവം ഓർത്തഡോക്സ് സഭാശാസ്ത്രത്തിൻ്റെ അടിസ്ഥാന വശമാണ്. ബൈബിൾ മുൻവിധികളിൽ വേരൂന്നിയതും കൗൺസിലുകളുടെ സ്ഥാപനത്തിലൂടെ പ്രകടിപ്പിക്കപ്പെട്ടതുമായ അനുരഞ്ജനം സഭയുടെ ജീവിതത്തിൽ കൂട്ടായ തീരുമാനങ്ങളെടുക്കലിൻ്റെയും ഭരണത്തിൻ്റെയും സമാധാനത്തിന്റെയും പ്രാധാന്യം ഊന്നിപ്പറയുന്നു. സുറിയാനി ഓർത്തഡോക്സ് സഭ ആധുനിക ലോകത്തിൽ ഭിന്നിപ്പ് മൂലമുള്ള വെല്ലുവിളികൾ കൈകാര്യം ചെയ്യുമ്പോൾ അതിൻ്റെ അനുരഞ്ജന സ്വഭാവത്തിന്റെ വേദശാസ്ത്ര തത്വങ്ങളുടെ മാർഗനിർദേശത്തിൻ്റെയും ജ്ഞാനത്തിൻ്റെയും അടിസ്ഥാനങ്ങൾ ഐക്യത്തിൻ്റെ സുപ്രധാന ഉറവിടമായി കണ്ടെത്തെണ്ടിയിരിക്കുന്നു.